8 bólkar stríðast fyri Wacken

Sunday 19. February 2012 - 15:43

Sic, Synarchy, Hamferð og fimm aðrir bólkar skulu kappast um at sleppa á størsta tungmálsfestivalin í heiminum.

Leygarkvøldið 24. mars skulu føroyskir rockbólkar kappast um at sleppa á heimsins størsta tungmálsfestival – Wacken festivalin í Týsklandi.
Tað er plátufelagið Tutl, sum saman við Norðurlandahúsinum og Ljóð Tøkni, skipar fyri tiltakinum. Talan er um eina talentkapping innan føroyskan tungmálmstónleik, har bólkar fáa møguleika at vísa teirra kynstir og útstráling á palli.
Besti føroyski bólkurin fær møguleikan at fara beinleiðis til Wacken Festival - størsta tungmálmsfestivalin í heiminum - at dystast ímóti vinnarum úr øðrum londum, ið luttaka í Wacken Metal Battle kappingini.

Nú er kunngjørt, hvørjir átta bólkar verða við í kappingini, sum verður hildin í Sjónleikarhúsinum í Havn.
Nógvar ymiskar tungmálmssjangrur eru umboðaðar - frá skjótum deyðsmálmi, nýmótans thrashmálmi til sorgbundnan dómadagsmálm og tann bleytara endan av málmrokki.
Bólkarnir, ið luttaka, eru: The Apocryphal Order, Konqueror, Incurse, The Happening, Sic, Synarchy, Hamferð og Earth Divide.